元朗下輋村三層式村屋案例

早排有好多人問驗唔驗村屋, 一般我哋聽到都唔會接, 因為村屋通常會涉及好多問題, 但最近幫一個業主驗完市區新樓,業主問,有個朋友入手咗間村屋,希望搵驗樓師幫手睇吓,見業主份人好Nice,OK, 去馬!

今次驗哩間村屋都算幾遠路,但屋內景觀及環境真係唔錯(如果唔計蚊蟲等大自然問題). 
 
一入到去已經發現有問題, 大門入口已經有個馬蜂巢就黎形成,而四周圍牆根部亦有一條條好明顯的裂痕.

之後我哋入屋放底工具, 開始由頂逐層驗落黎,第三層只係個廁所已經超多問題,廁所居然連個去水喉管都未駁好, 就交樓比業主,而洗手盤底更加有滲水痕跡,牆身電線面板亦未裝好,導致電線外露,  只係一個廁所已經用咗十幾張Memo貼,之後再驗廳,問題比例牌更多更嚴重, 而室內防水更做得得過且過... 最大問題係個露台,出現好嚴重結構層面問題,露台兩邊的支撐位同一時間出現一度都幾長的裂痕,即係話,你稍為肥少少,或者幾個小朋友同時喺露台玩跳跳跳,露台都分分鐘會成個冧落黎,而哩個問題,居然係唔止出現喺三樓, 連二樓都係一樣. 另外二樓仲有組電係未接好,導致屋內某個範圍完全無電, 至於後花園, 第一睇感覺係超大,但當細緻睇返, 唔講四面圍牆啲裂痕有幾勁, 剩講中間有幾塊地磚, 居然唔止係空心, 仲要係好簿,真係重少少都會成個跌落去水渠入面.

 

今次哩個Case出動兩個師父,用咗 接近 4-5個鐘先完成. 問題數目接近一百個, 真心希望發展商對自己要求可以高返啲,美觀都仲可以修正,結構方面真係好易攪出大件事...希望發展商可以快啲及謹慎幫業主執修返所有問題,尤其係結構上,整體評分係: 根本係一個半完成品.

More From The Blog